Манчестер Јунајтед успешно ја реализираше мисијата „Победа“ на гостувањето во Бирмингем и се доближи на само бод од зоната која води во европската елита.
И во десеттиот натпревар во серија Астон Вила остана без победа. Овој пат не беше ниту блиску до такво нешто бидејќи налета на забрефтаниот тим на Оле Гунар Солскјер.
Манчестер Јунајтед, пак, нема пораз од 22 јануари кога беше непријатно изненаден од Барнли на домашен терен. Со головите на Бруну Фернандеш од пенал, Мејсон Гринвуд и Пол Погба стигна до победата број 4 во низа.
Со новите 3 бода „Црвените ѓаволи“ сега имаат 58 бодови и со новото реми на Лестер сега му се доближија на само бод. Лестер е четврти, последната позиција која води во Лигата на шампионите. Тука е и Челси со 60 бодови.
Астон Вила и натаму е во опасната зона со 27 бодови, 4 помлаку од Вотфорд и Вест Хем чии места ги брка.
