Катарецот Насер Ал-Келаифи, претседател на Пари Сен Жермен и Qatar Sports Investments има голема желба да ја прошири својата фудбалска империја со инвестирање во клубови низ Европа.
Според извештаите на Sky Sports, катарските сопственици на ПСЖ, предводени од претседателот Насер Ал-Келаифи, минатата недела одржале состанок во Лондон со сопственикот на Тотенхем. Наводната тема на средбата била инвестирањето во клубот од северен Лондон.
Не е тајна дека катарските сопственици на Пари Сен Жермен имаат намера да инвестираат во фудбалски клубови, а како посебна желба се издвојуваат клубовите од англиската Премиер лига. Покрај сопственоста на ПСЖ, Qatar Sports Investment (QSI) поседува и малцински удел во португалската Брага.
Очекувањата беа дека по Мундијалот во Катар ќе се намали интересот на QSI за фудбалски инвестиции, но се чини дека се случува сосема спротивното. Според извештаите, катарската компанија подготвува амбициозен план за стратешки инвестиции во клубови ширум светот.
Како потенцијални инвестициски цели се споменуваат и Ливерпул и Манчестер Јунајтед, чии сопственици јавно ја потврдија потрагата по нови инвеститори.
