Откако со години одбиваше, Германија конечно на холандските власти им ги откри имињата на Холанѓаните кои сѐ уште добиваат пензија за служењето во хитлеровата СС за време на Втората светска војна.
Берлин испрати список со имиња на лица од Холандија кои земале германска пензија во периодот од 2015 до 2019 година со внесени точните суми на секој од нив. Ова го објави холандскиот државен секретар за финансии, Ханс Вајбриф, во писмо испратено до холандскиот Парламент, а пренесе локален медиум.
Излезе дека 34 луѓе во Холандија уживаат во бенефитите на таканеречената Кригсбешедигтенренте. Пензиите варираат од неколку стотини евра до најголемата која гласи 1.300 евра.
Најзастапени пензионери се екс припадници на Вафен СС, нивни вдовици или други блиски роднини. Холандските медиуми ги фати паника дека помеѓу нив може да се кријат и воени злосторници и поранешни чувари од злогласниот концетрационен камп Аушвиц бидејќи десетици холандски доброволци служеле во таквите кампови заедно со германските трупи.
Холандија веќе со години го тераше Берлин да ги открие имињата на ваквите холандски пензионери откако во 2014 година се обелодени дека илјадници луѓе низ цела Европа добиваат пензија од Германија поради нивниот допринос кај Адолф Хитлер. Пензиите биле доделени уште во 1945 година со директива на Карл Дениц, кој кратко беше наследник на Хитлер како лидер на Третиот Рајх. Декретот на Дениц гласел дека сите оние кои се здобиле со физичка или ментална траума додека ѝ служеле на Германија во Втората светска војна подлежат на пензија.
Холанѓаните се бунеа дека е неправедно уживателите на германска пензија да ги добиваат парите без да плаќаат данок, бидејќи исплатите се одвиваат без холандските даночни власти да имаат увид во нив. Истовремено, жртвите на војната, кои добиваат компензација, сите до еден подлежат на оданочување.
Вајбриф изјави дека прво ќе бидат проверени сите на списокот за да се утврди дека нема криминалци, а потоа Холандија нема да им ги укине германските пензии на своите граѓани, туку ќе почне да ги оданочува.
Во 1998 година во Германија беше изгласан закон со кој пензијата може да им се одземе на сите оние кои направиле воени злочини. Но, 76 години по војната, често е тешко да се докаже дека некој направил таков злочин. Досега само за околу 100 луѓе е докажано дека биле злосторници во Втората светска војна.
