Поранешната ѕвезда на Манчестер Јунајтед не гледа светла иднина за клубот со оглед на тоа како се одвиваат работите денес.
Рајан Гигс е загрижен дека на Манчестер Јунајтед можеби ќе му бидат потребни дури 20 години пред повторно да стане шампион на Англија.
„Можеби ќе треба да поминат 15, 20 години пред да освојат титула, особено ако Клоп и Гуардиола останат тука“, вели Гигс говорејќи за подкастот Greatest Game.
Како пример го даде Ливерпул и неговата голгота која траеше дури 30 години.
„Тие имаат финансиски средства и играчи. Како пример го имаме Ливерпул кој последен пат беше шампион во 1990 година. И тие тогаш си мислеа 'наскоро пак ќе освоиме'. Дури и на Клоп му беа потребни 4 и пол години за да стане шампион. Тоа си бара време“. Ливерпул долгиот пост го прекина минатата сезона.
„Мора да помислите на тоа што Клоп го направи. Тој секоја сезона го подобруваше тимот или освојуваше трофеи, како Лигата на шампионите. Се виде напредокот и притисокот попушти“.
Сега „Црвените ѓаволи“ се предводени од норвешкиот стратег Оле Гунар Солскјер, кој е и поранешен голгетер на клубот и воедно соиграч на Гигс.
„Секој тренер и засилување во Јунајтед се гледаат како 'ете, овој ќе ни ја донесе титулата', ама тоа не оди така“, смета Гигс кој целата својта играчка кариера ја мина токму во клубот од „Олд Трафорд“.
Велшанецот освои дури 13 титули шампион на Англија со Манчестер, а одигра 672 натпревара во Премиер лигата на кои постигна и 74 голови.
