Неверојатни сцени доаѓаат од најфудбалската земја на планетава каде навивачите на Гремиу ја демолираа ВАР опремата на стадионот.
Некогаш великан на бразилскиот фудбал, денес Гремиу грчевито се бори за опстанок. Претпоследен на табелата со 11 натпревари до крајот, Гремиу ита кон испаѓање, а синоќа направи уште еден чекор кон бездната откако загуби дома од Палмејрас.
Гремиу поведе во 11. минута преку Диегу Соуза, а во судиското надополнување од првиот дел гостите со двата гола на Рафаел Вејга направија пресврт.
Спорниот номент се случи на 4 минути до крајот кога младиот Елиас Алвис постигна гол за израмнување, но ВАР му го поништи поради офсајд. Потоа Палмејрас постогна победнички гол преку Брену во 93. минута.
По завршувањето на натпреварот гневните домашни навивачи влетаа на теренот и веднаш се упатија кон тунелот каде беше сместен телевизорот на кој главниот судија ги гледа спорните моменти консултирајќи се со неговите колеги од ВАР собата. Навивачите ја демолираа импровизираната соба кршејќи сѐ што им се најде на пат.
Играчите на двата тима беа во тунелот и со неверување го гледаа дивеењето на навивачите, кои потоа се судрија и со редарите. Откако пристигна специјалната единица за растурање толпа, навивачите се повлекоа назад на трибината, но штетата веќе беше направена.
Навивачите на Гремиу се злогласните Жерал, првата и најголема бразилска ултрас група.
Гремиу годинава освои дојна круна во регионалниот шампионат Гаушу, а лани стигна до финалето од бразилскиот куп. Има две титули шампион на Бразил (псоледната во 1996), а пред четири години ја освои Копа Либертадорес и потоа заврпши втор на Светското клупско првенство.