Вечерва ќе го дознаеме името на вториот финалист од оваа сезона во Лигата на шампионите, а против Борусија во Лондон ќе истрча Реал Мадрид или Баерн.
Синоќа Борусија од Дортмунд го исфрли ПСЖ со вкупен резултат 2:0 и влезе во финалето на Лигата на шампионите, а против кого ќе игра на 1 јуни на „Вембли“ ќе дознаеме по спектаклот на стадионот „Сантјаго Бернабеу“.
Во првиот натпревар Баерн доминираше и создаваше шанси, но Реал покажа зошто е најголемиот клуб во светот и успеа да ја напушти „Алианц“ арената непоразен.
Винисиус Жуниор го доведе Реал во водство, Баерн направи пресврт со головите на Лирој Сане и Хари Кејн, а потоа Вини погоди од пенал за 2:2, па вечерва во Мадрид ќе почнеме практично од нула бидејќи правилото гол на гости не важи.
„Секогаш сум уверен затоа што сме Реал. Го имаме најдобриот тим, и признавам дека Баерн беше подобар на првиот натпревар. Имаме шанса да влеземе во уште едно финале и ќе дадеме сѐ од себе за да го направиме тоа“, изјави тренерот на Реал, Карло Анчелоти.
Неговиот колега од другата страна, Томас Тухел, најавува интересен дуел.
„Мислам дека и двете екипи ќе имаат свои периоди на доминација. Двата тима знаат да играат во посед, но и во контранапади. Ќе победи оној кој подобро ќе ги искористи периодите на доминација во текот на натпреварот", изјави тренерот на Баерн.
Веројатни состави:
Реал Мадрид: Андриј Лунин; Дани Карвахал, Антонио Ридигер, Орелјан Чуамени, Ферлан Менди; Федерико Валверде, Тони Крос, Едуардо Камавинга, Џуд Белингам; Винисиус Жуниор, Родриго.
Баерн: Мануел Нојер; Јосуа Кимих, Матајс де Лихт, Ерик Даер, Нусаир Мазрауи; Леон Горецка, Конрад Лајмер; Лирој Сане, Томас Милер, Џамал Мусиала; Хари Кејн.
Полски судии
Правдата ќе ја дели Шимон Марчињак од Полска, а ќе му помагаат сонародниците Томаш Листкјевич и Адам Купсик, додека четврти судија е Иван Кужлиак. Во ВАР собата главен ќе биде Томаш Квиатковски, а ќе му помага Бартош Франковски.
ТВ пренос
Натпреварот започнува во 21 часот со директен пренос на МРТ3 и коментар на македонски јазик.