Српскиот тенисер со рутинска победа над Тејлор Фриц со 3:0 (6:1, 6:4 и 6:4) стигна до своето 14-то полуфинале на УС опен во кариерата и така дојде на два чекора од неговата 24. Грен слем титула во кариерата. Воедно, со пласманот во полуфиналето го надмина рекордот на легендарниот Роџер Федерер за најмногу полуфиналиња.
Осмиот меѓусебен дуел заврши исто како и претходните седум, со победа на Ѓоковиќ. Овојпат српскиот тенисер тргна во фуриозен ритам, а потоа како одминуваше мечот, својата шанса ја најде и Американецот, но недоволна за пласман во полуфиналето.
Во екстремно топлите услови во Њујорк, бидејќи во текот на натпреварот температурата на теренот беше измерена на 35°C со висока влажност, Ѓоковиќ подобро се справуваше. Во првиот сет го збриша ривалот со 6:1.
Вториот сет донесе рутинска работа за Ѓоковиќ. Направи брејк во третиот гем, поведе со 2:1 и потоа без поголеми проблеми стигна до 2:0. Фриц имаше само брејк топки во првиот гем откако Ѓоковиќ му го одзеде сервисот, но не можеше да возврати на ист начин.
Најголемата борба ја добивме во третиот сет. Таму Фриц одлично го чуваше својот сервис и веднаш добивме поинтересен меч.
До 3:2 и двајцата тенисери лесно го чуваа својот сервис. Тогаш Фриц прв пат упати опасна закана на сервис на Ѓоковиќ, но тој не успеа да направи брејк. Веќе во наредниот гем стигна казната. Второпласираниот на АТП листата потоа направи решавачки брејк и лесно го приведе мечот кон крајот за конечни 6:4.
Ѓоковиќ во полуфиналето ќе игра против Бен Шелтон (47. АТП) кој утринава го доби американското дерби против Френсис Тиафо (10. АТП).
Со оваа победа Ѓоковиќ по 47. пат успеа да се пласира во полуфинале на Грен слем турнирите, со што го надмина Роџер Федерер во оваа категорија. Рафаел Надал одамна го остави зад себе бидејќи Шпанецот има 38 полуфиналиња на најголемите турнири.
Новак наскоро би можел да собори уште еден од рекордите на Федерер бидејќи Швајцарецот има 58 четвртфиналиња на Грен слем турнирите, додека Ѓоковиќ во Њујорк го одигра четвртфиналето број 57.