Српскиот тенисер Новак Ѓоковиќ (2. АТП) се пласираше во 2. коло на УС опен откако рано утринава без поголеми проблеми го совлада Французинот Александре Мулер (84. АТП).
Натпреварот траеше нешто повеќе од час и половина, а по сетови беше 6:0, 6:2, 6:3 за Ѓоковиќ, кој беше апсолутен фаворит на овој дуел. Французинот како да не се ни беше појавил во првиот сет каде ги загуби сите три сервиси, па Новак го отвори овој меч од првото коло на последниот грен слем сезонава со 6:0.
Слично беше и во вториот сет, каде што Мулер покажа заби само во шестиот гем кога направи брејк и намали на 4:2. Сепак, Ѓоковиќ веднаш го враќа брејкот и со 6:2 се доближува до победата.
Двајцата тенисери добро сервираа во третиот сет с до седмиот гем кога Новак направи нов брејк, а нешто подоцна Мулер загуби уште еден сервис, што на крајот беше доволно за убедлив пораз.
Ѓоковиќ со овој триумф се врати на првото место на АТП листата со оглед на тоа што во Њујорк не бранеше ниту еден бод и дека разликата меѓу него и актуелниот шампион на УС опен, Карлос Алкарас, беше само 20 поени.
Србинот во 2. коло ќе игра против Шпанецот Бернабе Сапата Мираљес (76. АТП), кој го исфрли домашниот тенисер Итан Квин. Натпреварот меѓу Сапата и Ѓоковиќ е закажан за утре.
