Селекторот на македонската фудбалска репрезентација, Игор Ангеловски, го повикал Американецот со македонско потекло Дени Мусовски во иднина да ги брани боите на земјата од каде потекнува.
„Со Мусовски го остваривме првичниот контакт. Разговарав лично со него, дали поседува македонски документи и дали кај него постои желба да игра за Македонија. Ми кажа дека ќе му треба малку време да размисли, а јас ќе продолжам да го следам, затоа што за мене тој и тоа како е интересен фудбалер“, изјави Ангеловски говорејќи за порталот Гол.мк.
Мусовски има 24 години и тек годинава заигра во МЛС во дресот на Лос Анџелес. Роден е во Хендерсон во сојузната држава Невада, а првите чекори ги прави во Лас Вегас Спортс Академи пред да се пресели во колеџ тимот на УНЛВ Ребелс. Во 2018 на драфтот бил одбран од Сан Хосе 'Рткуејкс, но за нив не заиграл во МЛС туку бил пратен на позајмица во тимот на Рино 1868 кој се натпреварува во втората го ранг лига, УСЛ.
Пред четири дена токму Мусовски беше играч на натпреварот кога со два гола му донесе победа на Лос Анџелес над Сиетл Саундерс од 3:1.