Ниту Чиро Имобиле, ниту Матиа Ѕакањи, ниту Фелипе Андерсон - херојот на Лацио кој постигна гол и спаси бод е нивниот голман Иван Проведел.
Голманот на калчолигашот Лацио - Иван Проведел, во 95-тата минута од натпреварот против мадридски Атлетико постигна гол за 1:1 и му помогна на својот тим да избегне пораз на овој натпревар.
Гостите од Мадрид имаа водство од средината на првото полувреме, кога Бариос постигна гол со многу среќа, а тоа беше и резултатот со кој се замина на пауза.
Подоцна Лацио се обиде да израмни, иако неколку сериозни шанси имаа и гостите, а потоа во 5. минута од судиското надополнување беше забележана една крајно интересна ситуација во која голманот на домашните постигна гол за израмнување.
По еден корнер, топката се одби до Луис Алберто, играчот од средниот ред на Лацио упати остар центаршут во шеснаесетникот, а на вистинското место се најде Проведел, кој со глава го смени правецот на топката и ја испрати во мрежата.
На стадионот „Олимпико“ во Рим следуваше големо славје на домашните фудбалери, а иако гостите од Мадрид побараа фаул поради претходен дуел, ништо не излезе од тоа и натпреварот заврши со поделба на бодовите.
