Искусниот голман на Манчестер Сити, Скот Карсон, го повтори успехот на Паоло Малдини во Лигата на шампионите без никогаш да ја допре топката во актуелната сезона од најсилното фудбалско натпреварување во светот.
За Скот Карсон (37) на шега велат дека ја има најдобрата работа на светот. Добро е платен, не се заморува и не брани за Сити, а гледа одлични натпревари недела за недела од една од најдобрите позиции на теренот, клупата за резерви. Покрај тоа, тој освојува и трофеи.
Карсон синоќа го освои вториот трофеј во Лигата на шампионите, без да ја допре топката. Неговиот Манчестер Сити победи со 1:0 против Интер и за прв пат го освои најпрестижниот европски клупски трофеј, а искусниот Англичанец натпреварот, нормално, го гледаше од клупата за резерви.
Така, поранешниот англиски репрезентативец по вторпат ја освои титулата европски првак. Тоа го направи за прв пат пред 18 години со Ливерпул во тоа чудесно финале против Милан и враќање од 3:0 на 3:3. Интересно, како и синоќа, тоа го направи во Истанбул каде се играше финалето на Лигата на шампионите.
Карсон на тој начин го израмни рекордот на Паоло Малдини, еден од најголемите играчи што светот некогаш ги видел. Карсон ги освои титулите во Лигата на шампионите со разлика од 18 години, што му успеало само на Малдини.
Од титулата со Ливерпул до титулата со Сити поминаа 18 години, исто колку што поминаа од првата до последната европска титула на Малдини. Малдини освои вкупно 5 со Милан, а од првата до петтата поминаа 18 години.
За разлика од овосезонското издание на Лигата на шампионите, во кое не одигра ниту една минута, Карсон бранеше за Ливерпул во 2005 година во еден натпревар од четврт-финалето играјќи 90 минути против Јувентус.