Американската судска порота утврди дека Google незаконски ја направил својата онлајн продавница Google Play доминантна над продавниците за апликации на своите ривали, објави BBC.
Epic Games, која е сопственик на популарната игрица „Fortnite“, го тужеше Google во 2020 година за монопол над дистрибуцијата на апликации и плаќањата во апликацијата.
Стотици милиони луѓе ширум светот користат Google Play за да инсталираат апликации на мобилни телефони со оперативниот систем Android на Google. Компанијата соопшти дека ќе поднесе жалба на пресудата.
„Android и Google Play нудат повеќе избор и отвореност од која било друга голема мобилна платформа. Судењето покажа дека жестоко се натпреваруваме со Apple и неговата App Store, како и со другите продавници за апликации за Android уреди и конзоли за игрици. Ќе продолжиме да го браниме бизнис моделот на Android и остануваме длабоко посветени на нашите корисници и партнери во поширокиот екосистем на Android“, рече претставникот на Google, Вилсон Вајт.
Извршниот директор на Epic Games, Тим Свини, е задоволен од исходот на судењето.
„Победа над Google! По четири недели детално судско сведочење, поротата донесе одлука против монополот на Google Play по сите точки“, напиша Свини на социјалната мрежа X.
Адвокатите на двете компании ги изнесоа своите последни аргументи во судењето кое траеше повеќе од еден месец. Случајот, исто така, ги доведе во прашање таксите за трансакции до 30%, кои Google им ги наметнува на развивачите на апликации за Android.
Epic во тужбата наведе дека Google „ги потиснува иновациите и изборот“ преку „мрежа од тајни, антиконкурентни договори“.
Во противтужба, Google побара отштета од Epic за наводно прекршување на договорот за програмери.
Технолошкиот гигант се соочи со голем број слични антимонополски случаи, вклучувајќи го и оној со апликацијата за запознавање наречена Match.
Epic поднесе сличен антимонополски случај против Apple во 2020 година, но американскиот суд пресуди во корист на компанијата од Купертино во 2021 година.