Францускиот напаѓач именуваше 4 репрезентации помеѓу кои според него се крие новиот светски шампион.
Антоан Гризман верува дека две јужноамерикански и две европски репрезентации ќе го дадат победникот на претстојното Светско првенство кое во втората половина од есента ќе се одржи во Катар.
„Бразил, Аргентина, Шпанија и Франција... Има уште време, остануваме претпазливи. Но, ние имаме добар тим, непобедени сме на 9 натпревари, што е добар знак. Настрана тоа, за време на Мундијалот сѐ е многу потешко“, вели Гризман во интервју за GQ.
Неговата Франција е актуелен бранител на пехарот откако пред четири години во Русија стана светски шампион. Одбрана на титулата досега им успеала само на Италија и Бразил. „Аѕурите“ во оние предвоени антологиски првенства кога легендарниот Џузепе Меаца ги предводеше до титулите во 1934 и 1938, а „Кариоките“ од времето на виртуозот Пеле кога на Мундијалите во 1958 и 1962 во два наврата ја освојуваа титулата. Ниту една друга репрезентација не успеала двапати по ред да стане шампион, што покажува колку таквата мисија е тешко остварлива. Но, Гризман и Франција ќе се обидат да го сторат токму тоа.
„Дали можеме да ја одбраниме титулата? Тоа е многу тешка задача“, искрено вели тој.
Минатиот пат кога Франција се обиде да ја одбрани титулата, онаа генерација зо Зинедин Зидан, буквално се избламира откако во 2002 испадна уште во групата, како последна и без постигнат гол.
А, пак од 2010 на три првенства по ред бранителот испаѓа уште во групната фаза. Тоа ѝ се случи на Италија во 2010, потоа на Шпанија во 2014, а последно на Германија во 2018.
Франција во Катар е во групата Д заедно со репрезентациите на Данска и Тунис, а последниот противник ќе биде познат по јунските баражи каде Перу ќе игра со подобриот од дуелот меѓу ОАЕ и Австралија.