Легендарниот собир на GTI фанови ќе опстои.
Откако локалните власти решија да се откажат од идејата да бидат домаќини на Wörthersee Tour и со тоа ги разочараа стотиците илјади фанови кои го посетуваа настанот секоја година, Volkswagen активно се вклучи во приказната.
Компанијата многу брзо реагираше на веста со жалење и надеж дека традицијата сепак ќе продолжи. И така и ќе биде, бидејќи Volkswagen ќе го организира настанот „GTI Coming Home“ недалеку од својата фабрика во Волфсбург.
За жал, оваа година нема да има ништо, но следната година ќе се организира собир на љубителите на Volkswagen.
„Нашите GTI фанови се многу важни за Volkswagen и затоа сакаме да комуницираме со нив“, вели Имелда Лабе, член на Одборот за продажба, маркетинг и постпродажба на Volkswagen Passenger Cars.
Од Volkswagen велат дека по веста за откажување на GTI Meeting на езерото Вортерзе, решиле брзо да реагираат и да им понудат на своите фанови алтернативно решение. А притоа веројатно поддршката ќе биде уште поголема.
„Според тоа, сигурно ќе можеме да понудиме одредени моменти и изненадувања во наредната година“, рече Лабе.
Досега Volkswagen навистина знаеше да изненадува на австриското езеро со новитети како што се T-Roc R, Golf GTi cabrio и GTI W12-650. Се претпоставуваше дека оваа година ќе го претстават концептот ID.2 GTI.
Да потсетиме, на првиот собир во 1982 година имаше околу стотина посетители, додека во последните години пред пандемијата тој број беше околу 200.000.