Технологијата зад извонредната функционалност на возилото се заснова на модуларна EV платформа, роботска архитектура на нозете со 5 степени на слобода на движење и погонски мотори сместени во главите на тркалата.
Една од поинтересните вести од светот на електромобилноста деновиве доаѓа од Јужна Кореја и вели дека „првиот електричен автомобил што оди“ наскоро би можел да се најде во сообраќајот. Станува збор за концептот Elevate од компанијата Hyundai, претставен во 2019 година, на саемот за потрошувачка електроника CES во Лас Вегас.
Револуционерното возило, кое го развија специјалистите на компанијата Sundberg-Ferar од Мичиген, покрај традиционалниот начин на движење - на тркала, буквално може да оди и на четири нозе.
Ова се должи на сложениот систем на електро-механички споеви, на чии краеви има тркала, кои му овозможуваат на Elevate да се качува по скали или стрмни карпести терени (каде што нормалното теренско возило не би можело да помине), да се движи по вода издигнат над неа, па дури и да прескокнува одредени објекти.
На овогодинешниот CES повторно беше претставено функционално возило со роботски „нозе од скакулец“, класифицирано како Ultimate Mobility Vehicle (UMV).
За развојот – од идеја до прототип – најзаслужен е потпретседателот на Hyundai, Џон Су, кој го опишува Elevate како „првиот автомобил од класата трансформер во светот“. Лиценците за патент за него беа добиени во САД минатата година, што сугерира дека Hyundai навистина има намера да го направи Elevante „вистински“ производ.
Иновативното електрично возило може да биде од голема корист во најразновидните замисливи и незамисливи ситуации. Су истакнува дека Hyundai Elevate, на пример, би можел да им овозможат на хендикепираните лица ширум светот лесен пристап до влезните врати на зградите, за нивните инвалидски колички веднаш да влезат во објектот. Исто така, благодарение на своите роботски нозе, Elevante може да им обезбеди на спасувачките тимови пристап до загрозените области во најразновидните ситуации предизвикани од различни катастрофи.
„Кога цунами или земјотрес ќе погоди област, сегашните спасувачки возила можат да достават прва помош само до работ од каде што почнуваат урнатините“, рече првиот човек на овој проект. „Elevate може да вози веднаш до местото на настанот и да се искачи над остатоците од поплавите или срушените бетонски ѕидови“.
Затоа, возилото е многу погодно за најразновидни работи кои вклучуваат движење на тешко пристапни непристапни терени, па освен за зони на катастрофи, може да се користи и за истражување на непристапни планински и шумски области.
Роботот такси Cruise Origin, без „нозе“, на General Motors послужил како основа за Hyundai Elevate, со тоа што јужнокорејското издание нема волан и педали. Тоа е голема патничка кабина во која патниците седат еден спроти друг.
„Нозете“ се преклопуваат кога Elevate е во „нормален“ режим на возење, што значи дека Hyundai Elevate е целосно способен да вози по градските улици и автопати како и секој друг автомобил. Но, она што другите не можат да го направат е потоа да се качат на ѕид или друга пречка висока 1,5 метри, да преминат празнина широка 1,5 метри или да се искачат на тежок стрмен терен, додека патниците во кабината седат на рамно.
