Златан Ибрахимовиќ ќе го продолжи договорот со гигантот од Милан, што значи дека фудбал ќе игра барем до 2023 година.
Шведскиот голгетер нема намера да ги закачи копачките иако минатиот месец наполни 40 години. Напротив, тој најавува продолжување на кариерата.
Најтиражниот италијански весник La Gazzetta dello Sport јавува дека Ибрахимовиќ ќе потпише ново продолжување на актуелниот договор со Милан кој истекува во јуни наредната година. Повторно ќе биде едногодишно продолжување.
Засега нема детали дали и натаму ќе ја добива истата плата од 7 милиони евра по сезона, со која е најплатен во редовите на „Росонерите“.
Ибра се чувствува одлично во Милан, а и од таборот на клубот се задоволни од неговиот допринос, па оттаму и се очекува продолжувањето на договорот да оди глатко.
Златан сезонава постигна само 3 гола во сите натпреварувања, но некое време не играше поради повреда. Негова цел е настап на Мундијалот во Катар, но Шведска прво ќе мора да го мине баражот, а можен противник ѝ е и Македонија.
Освен со Ибра, Милан е во преговори за нов договор и со Тео Ернандес, Рафаел Леау и Исмаел Беннасер. Приоритет се и Алесио Ромањоли и Франк Кеси, но со нив преговорите не одат добро бидејќи и двајцата имаат намера да си заминат наредното лето.
