Напаѓачот на Милан го одби повикот на шведскиот селектор да ѝ помогне на својата земја во јунските натпревари од новата сезона на Лигата на нации на УЕФА.
Football Italia објави дека нивен извор им открил дека Златан Ибрахимовиќ го одбил повикот на селекторот Јане Андерсон за претстојните четири јунски натпревари од новата сезона на Лигата на нации, која почнува за две недели. Синоќа беше објавен шведскиот состав, а на него без објаснување го немаше Златан.
Сепак, изворот наведува дека Златан не се повлекува од националниот тим, туку не сака да ризикува нова повреда. Имено, Ибра од февруари до сега има настапено само на 7 натпревари за Милан и тоа секогаш како замена при крај на натпреварите откако прво го мачеше повреда на Ахиловата пета, а потоа и коленото. Поради тоа и не е во најдобра кондициска форма.
Ставот на Ибра бил дека и натаму ѝ стои на располагање на репрезентацијата за идните натпревари од септември.
За потсетување, Ибра се врати во препрезентацијата во март 2021 година со надеж да игра на ЕУРО 2020, но поради повреда го пропушти континенталниот собир. На негово разочарување потоа Шведска не се квалификуваше на Мундијалот во Катар.
Ибра има одиграно 121 натпревар за Шведска и постигнато 62 гола, а настапи на Мундијалите во 2002 и 2006, како и на ЕУРО 2004, 2008, 2012 и 2016.
Во Лигата на нации Шведска е во групата Б од Лига Б заедно со Словенија, Норвешка и Србија.
