Искомбинирајте два омилени балкански јадења и ќе добиете лажен гулаш со ќофтиња. Ова превкусно јадење ќе ја воодушеви целата фамилија.
Како што полека доаѓа поладно време повеќе почнуваме да преферираме потешки јадења, па така ручекот како салата и паста може комотно да се замени со вкусни јадења како што е гулашот. Ова традиционално унгарско јадење потекнува од дамнина, а долго се крчка со месо по избор.
Денеска ви предлагаме рецепт за лажен гулаш кој се прави со ќофтиња, компири и маслинки. Ќе уживате во неговиот вкус, а нема ни многу да се помачите правејќи го. Видеото со рецептот, кое го постираме на крајот од овој напис, е доста популарно на YouTube со досега над 2 милиона и 300 илјади прегледи. Сепак, освен ако не разбирате германски, ќе мора рецептот да го прочитате тука.
Потребни состојки:
За месото:
- 500 гр мелено месо
- 2 лажици презла
- 2 чешниња лук
- 1 јајце
- масло
За манџата:
- 1 кромид
- 3 чешниња лук
- 100 гр сушен домат
- 1 коцка супа
- 250 мл вода
- 250 мл сос од домати
- ⅓ лута пиперка
- 4 компири
- 1 морков
- 50 гр маслинки
- 20 гр копар
Подготовка:
Во меленото месо додадете презла, мелен лук и јајце. Потоа добро соединете и обликувајте го секое ќофте, па испржете ги во тава во која претходно сте загреале масло. Готовите ќофтиња извадете ги на хартиени крпи (или салфетки) за да се исцедат од вишокот масло. Потоа во тенџере пропржете ги ситно сечканиот кромид и лук, па додадете го сушениот домат. Растопете ја коцката супа во вода и додадете ја. Потоа додатете и сос од домати. Промешајте, додадете ја и сечканата лута пиперка, посолете и додадете зачини по избор. Кога сосот ќе почне да крчка додајте сечкан морков и парчиња компир. Потоа ставете ги и ќофтињата во тенџерето со сосот и додадете ги маслинките. Поклопете и оставете да се готви околу 35-40 минути. Готовиот лажен гулаш посипете го со сечкан копар.
