Илон Маск денеска ќе започне со масовни отпуштања во Twitter, соопштила компанијата во интерна порака по е-пошта испратена во четвртокот до вработените во социјалната мрежа.
„Во обид да поставиме здрав пат за Twitter, в петок ќе поминеме низ тешкиот процес на намалување на нашата глобална работна сила“, се вели во е-поштата до чија содржина дојде Reuters. И New York Times и Washington Post исто така објавија за отпуштањата и ја наведоа интерната порака.
Веста за отпуштањата во Twitter доаѓа по шпекулациите дека Маск ќе отпушти дури 50 отсто од работната сила на социјалната мрежа, само неколку дена откако стана шеф на компанијата што ја купи за 44 милијарди долари. Ова може да значи губење на илјадници работни места, бидејќи компанијата имаше повеќе од 7.000 вработени на крајот на 2021 година.
Twitter во е-пошта до вработените соопшти дека неговите канцеларии ќе бидат привремено затворени и сите пристапи ќе бидат суспендирани „за да се обезбеди безбедноста на секој вработен, како и системот на Twitter и податоците на корисниците“.
Маск веќе отпушти некои директори на Твитер веднаш откако ја презеде контролата врз компанијата, вклучително и извршниот директор Параг Агравал, директорот за финансии Нед Сегал и шефот за правни прашања и политика Вијаја Гада.