Американскиот милијардер Илон Маск објави, па избриша пост на Twitter во кој канадскиот премиер Џастин Трудо го спореди со нацистичкиот водач Адолф Хитлер. Критиките за овој негов потег не стивнуваат.
Во спорната објава, Маск се осврна на податокот од CoinDesk, дека канадската Влада презела акција против трансакциите со криптовалути за да не им се помага на возачите на камиони кои протестираат против вакцинирањето.
Најбогатиот човек во светот одговори со објавување на фотографија од Хитлер и натпис: „Престанете да ме споредувате со Џастин Трудо. Имав ограничен буџет“.
Шегата на Маск наиде на остри критики од еврејските организации.
„Илон Маск постапи крајно непромислено, спомнувајќи го Хитлер за да го каже своето мислење на социјалните мрежи. Мора веднаш да се извини“, се вели во соопштението на најстарата невладина организација во САД – Американскиот еврејски комитет.