Илон Маск продолжува со своите, благо кажано, изненадувачки изјави.
Од Tesla секогаш кажувале дека не гледаат конкуренција од другите производители на електрични возила, туку дека нивните најсериозни ривали се традиционалните производители на автомобили со мотори со внатрешно согорување. И навистина, ако сакаат да ги остварат своите планови за продажба, сигурно ќе мора да земат парче од колачот токму од оние производители со вековна традиција.
Да потсетиме, Илон Маск пред речиси една година изјави дека нивната цел е Tesla да го зголеми производството на 20 милиони единици годишно до 2030 година. Звучи невозможно, особено ако се земе предвид дека моментално најголемиот производител, Toyota, произведува едвај над десет милиони возила.
Некои се прашуваат што би се случило ако се појави производител со подобри електрични возила од Tesla. Наводно, Илон Маск не би имал ништо против тоа, тврди Хиромичи Мизуно, член на управниот одбор на Tesla. Тој изјави за CNBC дека Илон Маск рекол дека ќе прифати банкрот на Tesla доколку некој ривал лансира подобар електричен автомобил.
„Не се согласувам секогаш кога Илон вели дека не му пречи Tesla да банкротира ако некој друг излезе со подобар автомобил. Мислам дека тоа е негова филозофија и на Tesla“, изјави Мизуно. Од неговите зборови лесно се чита дека Маск во неколку наврати го спомнал банкротот на Tesla. Тешко е да се каже дали Маск мисли дека ова е една од опциите или е толку убеден во супериорноста на Tesla што толку се опушта со ваквите изјави.
Инаку, Хиромичи Мизуно е поранешен главен инвестициски директор на Јапонскиот државен пензиски инвестициски фонд и се приклучи на одборот на Tesla во април 2020 година.