Фудбалерите на Интер му го нанесоа првиот пораз на лидерот Наполи сезонава во Серија А, а единствениот гол во дербито од 16-тото коло го постигна Един Џеко.
Пред 75.470 гледачи на стадионот „Џузепе Меаца“ во Милано синоќа се одигра дербито на првото коло по паузата во Серија А, во кое лидерот Наполи му гостуваше на Интер.
„Нераѕурите“ можеа да поведат уште на самиот почеток од натпреварот, но Федерико Димарко проигрувањето од Ромелу Лукаку на втора статива не го претвори во гол. Интер повторно се закани во 26. минута, но овојпат Матео Дармјан не беше прецизен по одличната асистенција на Џеко.
Уште една одлична шанса за Интер имаше Лукаку во 41. минута, но со десната нога шутираше над голот, а треба да се каже дека и Наполи имаше неколку опасни ситуации во првото полувреме, но голманот на Интер, Андре Онана, немаше потреба да реагира, или подобро кажано, ударите не беа прецизни.
Во 52. минута Наполи можеше да поведе, но Онана овојпат беше на вистинското место и го одбрани ударот на Осимхен, а само четири минути подоцна Интер постигна гол.
Димарко ја прими топката по левата страна, нафрли во шеснаесетникот на гостите, а Џеко откако му побегна на својот чувар Амир Рахмани, кој страшно лошо беше поставен, погоди со глава и му донесе водство на својот тим. Тоа беше негов седми првенствен гол сезонава и вкупно 10-ти во сите натпреварувања, вклучувајќи ја и Лигата на шампионите.
Македонскиот репрезентативец Елиф Елмас натпреварот го почна од гостинската клупа, а во игра влезе во 76. минута на местото на грузиското чудо Хвича Кварацхелија. Сепак, ниту Елмас не успеа да му помогне на тимот на Лучано Спалети да го избегне поразот.
Интер рутински ја сочува стекнатата предност и оствари голема победа и тоа над единствениот до синоќа непоразен тим во Калчото.
Со оваа голема победа Интер стигна до 33 освоени бода сезонава, што е еден помалку од третопласираниот Јувентус и три помалку од второпласираниот Милан, додека Наполи и покрај поразот останува на првото место со 41 освоен бод. Иако разликата и натаму е солидна, сепак е далеку од недостижна со оглед на тоа што во Серија А математички уште не е ни полусезна бидејќи има уште три кола од првиот дел.
Табела: