Турција денеска официјално го напушти меѓународниот договор насочен кон борба против насилството врз жените, т.н. Истанбулска конвенција. Оваа одлука на претседателот Реџеп Тајип Ердоган доби жестоки критики, како во Турција, така и во странство.
Протести против повлекувањето од Истанбулската конвенција, најавено од Ердоган во март, а кое стапи на сила вчера на полноќ, се закажани за неколку дена во повеќе турски градови.
Конвенцијата на Советот на Европа за спречување и борба против насилството врз жените и семејното насилство, т.н. Истанбулска конвенција е документ од 2011 година, потпишан од 45 земји и ЕУ.
Тоа е првиот правно-обврзувачки и сеопфатен меѓународен механизам за борба против насилството врз жените и семејното насилство.
Конвенцијата обезбедува нова и детална меѓународна правна рамка за поефикасно искоренување на семејното насилство и насилството врз жените.
Одлуката на Ердоган да ја повлече својата земја од Конвенцијата, иако бројот на убиства на жени во Турција се зголеми во текот на изминатата деценија, ги налути организациите за заштита на жените и критичарите на ЕУ, Вашингтон и на Високиот комесаријат за човекови права на ООН.
Турската влада ја објасни својата одлука со изјава дека Истанбулската конвенција „ги поткопува семејните вредности“ и „сака да ја прикаже хомосексуалноста како нормална“ затоа што повикува луѓето да не бидат дискриминирани врз основа на сексуална ориентација.
За разлика од многу земји со мнозинство муслимани, хомосексуалноста не е забранета со закон во Турција, но хомофобијата е широко распространета, посочува Франс Прес.
Аналитичарите ја толкуваат одлуката на Ердоган пред сѐ како негова желба да го обедини конзервативното гласачко тело во контекст на економските тешкотии на земјата.
„Ова повлекување испраќа опасна порака до оние кои вршат насилство, осакатуваат или убиваат: им кажува дека можат да продолжат да го прават тоа со целосна неказнивост“, рече лидерот на Амнести Интернешнл, Ањес Каламар.
„Во однос на правата на жените, Турција се врати десет години наназад“, додаде таа.
Минатата година, 300 жени беа убиени во Турција од страна на нивните партнери или поранешни партнери, според Здружението за правата на жените „Да ставиме крај на убиството на жени“.
Оваа година нема тренд на опаѓање бидејќи досега биле убиени 189 жени, рече истиот извор.