По 13 различни дизајни на домашните дресови, од кои некои веќе станаа легендарни, Италијaнската фудбалска федерација одлучи да се раздели со Puma и да ја замени со нејзиниот сосед Adidas.
ФИГЦ новото партнерство со Adidas го почнува од 1 јануари 2023 година бидејќи договорот со Puma истекува на 31 декември 2022. „Аѕурите“ се збогуваат со баварскиот производител после цели 20 години и 13 различни дизајни на дресови со кои освоија и Мундијал во 2006 и ЕУРО во 2021.
„20 години на нашите гради“, твитна официјалниот профил на репрезентацијата на Италија.
„Благодарност до Puma, нашиот спонзор за дресови, што нѐ придружуваше до врвот на светот и потоа до оној на Европа, за тоа што ја облекуваше секоја наша победа и секој пораз и што со нас го споделуваше сонот кој сите нѐ обединува, оној на 'Аѕурите'“, се вели во соопштението објавено од ФИГЦ.
Сите 13 дизајни на домашните дресови произведени од Puma:
Нема да биде првпат Adidas да ги облекува Италијанците, но ќе биде после долго време. Производителот од баварското гратче Херцогенаурах, од каде - интересно - е и Puma, беше првиот спонзор на дресови на Италија и тоа од 1974 до 1979 година. Претходно „Аѕурите“ немаа спонзори.
Оттогаш Италија смени пет други производители на спортска опрема и тоа францускиот Le Coq Sportif (1980-1986), домашната Diadora (1986-1995), американскиот Nike (1996-1999), домашната Kappa (2000-2002), па Puma (2003-2022).
Промената на спонзорот значи и дека Италија ќе ја видиме во нови дресови, веројатно уште во март кога почнуваат квалификациите за ЕУРО 2024. Останува да видиме со каков дизајн ќе изненади Adidas.
