Горан Иванишевиќ, тренерот на Новак Ѓоковиќ до неодамна, како причини поради кои повеќе не соработува со српскиот тенисер ги посочи заморот и исцрпеноста.
Ѓоковиќ неодамна на социјалните мрежи објави крај на нивната петгодишна соработка по слабиот старт на сезоната, а Иванишевиќ изјави дека „се умориле еден од друг“ и дека разделбата била неизбежна.
„Многу читам... Луѓето мораат да пишуваат, но никој не беше ни приближно блиску до погодување. Нема вистинска причина, вистинската причина е заситеноста. Ова беа исклучително тешки пет години, луѓето забораваат на короната и дека тој во еден момент беше светски негативец број еден поради невакцинирањето. Секогаш бевме во некој меѓучекор, некој министер го забрануваше, лудилото со Австралија... Имаше заситеност, материјален замор - и колата оди на технички ... И тој се умори од мене, а јас се уморив од него. Не можев повеќе да му помогнам, но направивме голема работа“, изјави Иванишевиќ во интервју за Sportklub.
Како што вели, сè започнало многу пред Индијан Велс, каде Ѓоковиќ доживеа неочекувана елиминација против Нарди.
„Не дојде до разделба сега во Америка, никогаш тоа не се ‘случи’. Ако бидам искрен, тоа го почувствував на УС Опен минатата година. Како тренер, Вимблдон ми беше многу тежок, Алкараз беше подобар во крај и секоја чест за него, но еден-два бода... Америка беше неверојатна, ги освои Синсинати и УС Опен, и таму веќе почувствував дека крајот е близу, прашање беше дали на крајот на годината или некогаш оваа година... Можеби требаше да го направиме тоа лани, но по УС Опен го оперирав коленото, ме немаше шест-седум недели, се вратив за Торино, но веќе го имаше тој замор, комуникацијата“, заклучи Иванишевиќ.
