Јуветус пред себе има голем проблем бидејќи му виси пласманот во Лигата на шампионите, а евентуален неуспех би значел и разделба со Кристијано Роналдо.
По синоќешната бламажа среде Торино против Милан, „Бјанконерите“ паднаа на 5. место во Серија А излегувајќи од зоната која гарантира место во европската елита.
Без настап во Лигата на шампионите приходите на клубот зачително ќе се намалат, а Calciomercato тврди дека при такво сценарио првата жртва која Јуве ќе биде принуден да ја направи ќе биде разделба со скапиот Роналдо.
Дури и Јуве да може да си го дозволи Португалецот, тешко веројатно е дека самиот играч ќе сака да остане ако се знае неговата екстремна желба за поставување рекорди токму во Лигата на шампиони.
Проблем е што неговиот агент Жорже Мендеш тешко ќе најде клуб кој би се согласил да му ја плаќа платата која Роналдо ја зема во Јуве. Порано тоа немаше да биде проблем, но иако Роналдо е Роналдо, сепак има 36 години.
Сезонава со 27 голови е најдобар стрелец во Серија А и со три кола до крајот има шанси да ја однесе „Старата дама“ во елитата на европскиот фудбал. Јуве со 69 бодови е само бод зад четвртото место кое го држи Наполи, а до крајот на сезоната го чекаат Сасуоло (гости), Интер (дома) и Аталанта (гости).