Клубот од Торино го официјализираше трансферот за кој веќе некое време се зборуваше на Чизмата.
Душан Влаховиќ и официјално е нов играч на „Старата дама“ откако клубот го потврди неговото доаѓање. Јувентус на Фиорентина ќе ѝ плати 80 милиони евра за неговите услуги, од кои 70 милиони веднаш, додека останатите 10 кога играчот ќе постигне одредени бројки врзни за неговите настапи и голови.
22-годишниот српски голгетер е во неверојатна форма сезонава постигнувајќи 17 голови на 21 натпревар во Серија А во дресот на „Виолетовите“ од Фиренца. Неговите настапи го привлекоа вниманието на многу клубови ширум Стариот континент, а иако некои понуди беа и побогати од оваа на Јуве, самиот играч беше одлучен да оди во Торино, што ги разгневи навивачите на Фиорентина.
Во Јуве Влаховиќ ќе заработува 7 милиони евра по сезона, а договорот му е до јуни 2026 година. Неговиот агент ќе инкасира 11 милиони евра за направениот трансфер.
Се очекува да дебитира веднаш по репрезентативната пауза, односно на 6 февруари против Верона.
Неговото пристигнување во Торино ја отвора вратата за заминување на Алваро Мората, кој шпекулациите го поврзуваат со трансфер во Барселона, Њукасл и Тотенхем.
