Нема повеќе непоразени екипи во Калчото откако синоќа во дербито во Милано актуелниот шампион Јувентус со 3:1 славеше над Милан.
Дека гостите од Торино се дојдени по три бода на „Џузепе Меаца“ најави Федерико Кјеза уште во 18. минута кога по итра асистенција со пета на Пауло Дибала го отвори резултатот.
„Росонерите“ успеаја да израмнат на четири минути пред паузата кога Рафаел Леау го пронајде Давиде Калабрија кој со одличен удар ја смести топката во мрежата на Војчех Шченсни.
Јувентус повторно дојде во водство и тоа повторно со гол на Кјеза и тоа одличен удар, овој пат во 62. минута, а потоа во 76-тата американскиот фудбалер Винстон МекКени ги постави конечните 1:3 по асистенција на Дејан Кулушевски.
Мора да се напомене дека Милан играше без Златан Ибрахимовиќ кој сепак не се операви од повредата на време.
Ова е прв пораз за Милан по 16 кола во Серија А, но и победа за Јуве со која се враќа во игра за Скудетото иако разликата помеѓу двата е навидум високи 7 бода, но Јувентус има и натпревар помалку.
Со поразот на Милан и Рома се вклучи во борбата бидејќи дојде на -4, додека шанса да го зграпчи врвот пропушти Интер кој синоќа загуби на гости кај Сампдорија.