Денеска започнува нокаут фазата во Лига Европа, а без сомнение најинтересниот дуел нѐ очекува на стадионот „Камп Ноу“ каде Барселона ќе го пречека Манчестер Јунајтед.
Во минатото шпанскиот и англискиот гигант ги играа своите дуели во Лигата на шампионите, но сега времињата се сменија и тие се борат за вториот најважен европски фудбалски трофеј.
Барселона е фаворит во вечерашниот осминафинален натпревар кој започнува во 18 часот и 45 минути, а тренерот Чави може да смета на сите играчи освен на Серхио Бускетс и на Усман Дембеле.
Од друга страна, Ерик тен Хаг има многу проблеми со повреди и суспензии поради картони. Четворица играчи се повредени, а Лисандро Мартинес и Марсел Сабитцер кои ги пренесоа заработените картони од Баерн се суспендирани, па гостите ќе имаат многу проблеми да го состават тимот.
Досега Барса и Манчестер Јунајтед се имаат сретнато 10 пати на официјални натпревари, сите во Лигата на шампионите. Барселона има 5 победи, Манчестер само 1, а 4 пати ремизирале. Прв пат играле во 1994 година, а последен пат во 2019.
УЕФА довербата овој натпревар да го суди му ја додели на Италијанецот Маурицио Мариани, кому ќе му помагаат сонародниците Даниеле Биндони и Алберто Тегони, а четврти судија е Симоне Соѕа. ВАР собата ќе ја предводи Масимилиано Ирати, а ќе му асистира Србинот Дејан Филиповиќ.
Ерик Тен Хаг: „Мислам дека Барса исто така е тежок клуб за водење, но мислам дека тие го играат својот најдобар фудбал веќе неколку години - се гледа влијанието на Кројф овде. Добро се бранат, но мислам дека нивната најголема вештина е што имаат толку многу посед. Да го цитирам Јохан Кројф: 'Кога ја имате топката, противникот не може да постигне гол'“.
Чави Ернандес: „Верувам дека Тен Хег сигурно го промени овој тим. Му беше тешко на почетокот, но сега работи одлично. Тие се моќен тим со физичка сила, имаат многу оружја и ќе биде тешко. Очекувам многу интензитет, многу ритам, тоа е она што го очекувате од англиските екипи. Ова е европско натпреварување и сакаме да покажеме дека можеме да играме на највисоко ниво“.
Од останатите дуели, Рома на Жозе Мурињо патува кај Салцбург, а Јувентус обидот да ја спаси сезоната ќе го почне против француски Нант.
18:45
Ајакс - Унион Берлин
Барселона - Манчестер Јунајтед
Салцбург - Рома
Шахтар - Рен
21:00
Баер Леверкузен - Монако
Јувентус - Нант
Севиља - ПСВ
Спортинг - Митјиланд
Реваншите ќе се играат наредниот четврток, на 23 февруари.