Многу деца растат мечтаејќи еден ден кога ќе пораснат да станат астронаути кои ќе бидат дел од мисии на Месечината или на Марс. Но, за да се добие оваа за многумина недостижна работа, потенцијалите астронаути минуваат низ строг процес на селекција.
На пример, за НАСА класата од 2021 година, американската вселенска агенција одбра само 10 кандидати од 12.000 пријавени. Основни услови се да имате американско државјанство, магистерска од областа на инженерство, биологија или информатика. Астронаутите мора да бидат во добра психофизичка форма и способни да ги поминат строгите тестови на НАСА.
Првите астронаути биле војници, што е и логично бидејќи првата вселенска трка се одвивала во текот на Студената војна меѓу САД и Советскиот Сојуз. Денес, изборот е поразличен, па не мора да бидете пилот или војник за да одите на Месечината.
Но, мора да минете ригорозен тренинг, двегодишна обука за квалификуван астронаут. Обуката се случува во различни средини и услови, од огромни базени до аеродроми и врели пустини, со цел да се тестира нивната храброст и издржливост.
Астронаутите тренираат под вода или во големи затворени базени, нуркаат во базен што симулира микрогравитација или бестежинска состојба, со цел да се добие чувство како да е во вселената.
Астронаутите минуваат и низ други тестови, а исто така ги тестираат и психолошки. Патувањето во вселената е многу стресно и астронаутите мора да ги поднесат промените во спиењето, изложеноста на силни зрачења, промени во гравитацијата и да се изборат со долгата изолација.
Откако ќе станат астронаути, редовно разговараат со медицински персонал, вклучително и со психолози. Одржувањето на менталното здравје е особено голем предизвик, со оглед на тоа што НАСА планира да испрати луѓе на Месечината и на Марс.