Покрај кардиоваскуларните проблеми, прекумерната употреба на сол може да го ослабне нашиот имунолошки систем.
Одамна е познато дека прекумерното внесување сол во организмот може да му наштети на здравјето на луѓето. Со текот на времето, тоа може да доведе до висок крвен притисок и зголемен ризик од мозочен удар, но се чини дека го ослабува и имунолошкиот систем. Научниците за прв пат го открија ова во 2021 година, кога ги истражуваа функциите на клетките за чистење и влијанието на прекумерната консумација на сол на нашето тело.
Една нова студија предводена од д-р Доминик Милер од Центарот „Макс Делбрик“ и д-р Маркус Клајневитфелд од Истражувачкиот центар „ВИБ“ сега покажува дека адаптивната имунолошка одбрана, под влијание на високите нивоа на сол во клетките - предизвикува прекумерни воспалителни реакции во телото, слични на оние забележани кај автоимуни болести.
Појдовна точка на студијата биле резултатите од претходните студии, кои докажаа дека исхраната со премногу сол ги ослабува митохондриите на макрофагите и моноцитите, односно клетките за чистење на имунолошкиот систем кај пациенти со автоимуни болести и дека тие повеќе не функционираат правилно.
„Се прашувавме дали слични проблеми се јавуваат кај здрави субјекти“, вели Милер.
За да го пронајдат одговорот на ова прашање, истражувачите внимателно ги испитале Т клетките кои се суштински дел од адаптивниот имунолошки систем. Познати се и како „имунолошка полиција“ бидејќи ги држат под контрола агресивните клетки на имунолошкиот систем и нивниот одговор - бидејќи ако тие не функционираат како што треба, може да дојде до инфламаторни реакции и автоимуни болести.
Резултатите од истражувањето покажаа дека прекумерната употреба на сол може да покрене слични процеси и кај здрава особа, поради покачена концентрација на јони на натриум внатре во клетките, што го спречува правилното функционирање на митохондриите. Резултат на тоа се дисфункционални Т клетки кои повеќе не можат да ги исполнуваат своите задачи во имунолошкиот систем. Исто така, истражувачите се сомневаат дека зголеменото ниво на сол во телото може потенцијално да допринесе кон динсфункција на Т клетките кај пациенти со различни болести.
„Бидејќи тие исто така играат важна улога во болестите како што се рак или кардиоваскуларни болести, разјаснувањето на ефектите од прекумерната употреба на сол би можело да ги разјасни промените во функционирањето на Т клетките кај различни болести“, вели д-р Клајневитфелд. Меѓутоа, потребни се дополнителни студии за да се разберат потенцијалните врски.
