Најдобриот македонски тенисер Калин Ивановски го има најдобриот ранкинг во кариерата на АТП рангирањето. Тој новата седмица ја почнува на 306. позиција и забележа скок од 30 места по победата на фјучерс турнирот во Крамшах.
Ивановски има 176 поени, а освои 21 по триумфот во Австрија. Оваа недела Калин Ивановски настапува на челенџер 100 турнирот во Бања Лука, Босна и Херцеговина.
Од другите наши тенисери, Горазд Србљак се наоѓа на 1130. место со 8 поени, додека Обрад Марковски е рангиран на 1220. позиција со 6.
Во конкуренција на двојки, Калин Ивановски се наоѓа на 608. место на АТП листата.
На врвот нема промени - прв и натаму е Карлос Алкарас со 9.225 поени, а втор е Новак Ѓоковиќ со 8.795. Следуваат Даниил Медведев, Стефанос Циципас, Каспер Руд, Холгер Руне, Андреј Рубљов, Јаник Синер, Тејлор Фриц и Френсис Тиафоу во топ 10.