Репрезентативецот на Гвинеја не сакаше да ризикува Пеп да го извади од игра Холанд, па на паузата му го побара дресот.
Мохамед Али Камара го доби дресот на одличниот Норвежанец Ерлинг Холанд. Но, не го направи тоа на традиционалниот начин по завршување на натпреварот, туку на полувремето.
Холанд е еден од најдобрите фудбалери на денешницата и токму затоа неговиот дрес е на цена. Противничките играчи често по завршувањето на натпреварите се тркаат кој прв да стигне до него за да разменат дресови.
Гвинеецот од Јанг Бојс не сакаше ништо да препушта на случајноста, па го начека Норвежанецот на полувреме, на патот кон соблекувалните. Холанд без никаков проблем го прифати неговото барање, го соблече дресот и му го даде.
Излезе дека Камара стратешки паметно постапил со оглед на тоа што Пеп Гуардиола го повлече од игра Холанд во 61. минута кога победникот веќе беше решен. Десет минути претходно Холанд го постигна својот втор гол на натпреварот за водство од 3:0, што на крајот се покажа како конечен резултат. Во меѓувреме Јанг Бојс добија и црвен картон, а Холанд си доби заслужен одмор излегувајќи половина час порано.
Сепак, потегот на Камара, кој е капитен на Јанг Бојс, не наиде на одобрување во швајцарската јавност. Тој стана мета на критики и е обвинет за непрофесионално однесување и лош пример за еден капитен.
Дел од негативните коментари велат дека можел барем да почека да влезат во тунелот, а не тоа да го прави на теренот додека камерите го снимаат.