Италијанскиот новинар ја разбранува фудбалската јавност на Чизмата со изјавата дека македонскиот репрезентативец е десетпати подобар од италијанскиот бисер Давиде Фратези.
Многу фама се крена на почетокот од летниот преоден рок откако пола калчо гиганти се тепаа за потписот на Давиде Фратези. 23-годишниот играч од средниот ред деновиве заврши во Интер за 27 милиони евра, најавен како огромно засилување, а тоа го фрапираше новинарот Карло Алвино, кој е и навивач на Наполи каде игра нашиот Елиф Елмас.
„Фратези се претставува како шампион, а реалноста е дека десетмина Фратези технички прават еден Елиф Елмас. Но, проблемот е што Наполи не ужива внимание и не се крева толку високо, па затоа едните поминуваат како шампиони, а другите како да не се шампиони“, рече тој во програмата на најпопуларното неаполско радио Kiss Kiss.
„Моето размислување поаѓа од еден едноставен факт. И двајцата се млади, но Елмас има големо искуство со настапите во Наполи, репрезентацијата и европските купови. И некако вагата е премногу спуштена за Македонецот. Елмас во Наполи одигра одлично и тешко ми е да разберам зашто него го сметаат за никој, а Фратези е шампион“, вели Алвино“, додаде.
„Ама, во Италија број еден спортски директор е Карневали (Џовани Карневали, спортскиот директор на Сасуоло, заб. на авт.), па затоа е вака. Ако некој треба да ги собира почестите, тоа е Џунтоли (Кристиано Џунтоли, довчерашниот спортски директор на Наполи, заб. на авт.), кој 8 години работеше, никој глас не му слушна, но сѐ што се врти околу Наполи едноставно има негативна вредност. Сега отиде во Јувентус, и штом е така, значи дека вреди. Затоа ќе повторам, по која основа Фратези е подобар од Елмас?“.
И Елмас како Фратези има 23 години, а и двајцата во септември ќе наполнат 24. И вредноста според Transfermarkt им е тука некаде - Елмас вреди 26 милиони евра, а Фратези 25. Елмас има освоено по едно Скудедо и Копа Италија, додека Фратези сѐ уште нема трофеј. На репрезентативно ниво неспоредливи се: Елмас има 49 настапи, 11 гола и настап на ЕУРО, а Фратези има само 6 настапи и 1 гол.