Каталонија ќе олесни некои од мерките за спречување на ширењето на COVID-19 од следната недела, соопшти денеска локалната власт.
Дозволено е отворање на спортски сали, кафулиња и ресторани, бидејќи бројот на новозаразени паѓа и во покраината и во цела Шпанија.
„Веруваме дека пикот на третиот бран е зад нас“, рече каталонскиот министер за здравство Марк Раментол на прес-конференција.
Двонеделната инциденца на заразени падна на 783 на 100.000 жители, што значи дека за првпат е под 800 во последните 14 дена.
Мадрид претходно најави олеснување на мерките почнувајќи од денеска.
Како и да е, Шпанија сè уште го има третиот најголем број на дневни инфекции во светот и притисокот врз здравствениот систем останува висок. Вчера имаше 29.960 новоинфицирани, вкупно повеќе од 2,9 милиони, а бројот на починати се зголемил за 432 на вкупно 60.802.
Во Каталонија, каде што инциденцата е под 500 на 100.000 луѓе, во понеделник ќе се отвораат кафулињата и рестораните каде ќе може по еден час да се служи појадок и ручек во локалите, а остатокот од денот ќе работат со храна за носење.
Забраната за напуштање на општината, освен од работни или здравствени причини, ќе се олесни постепено, а другите ограничувања воведени во јануари ќе останат на сила.
Големите продавници и трговски центри остануваат затворени, а помалите продавници со несуштинска стока ќе бидат отворени од понеделник до петок. Полицискиот час останува во сила од 22 до 6 часот наутро.
