„Стар си околку колку што се чувствуваш“ е совршената изрека која може да го опише јапонскиот фудбалер Казујоши Миура, кој ќе продолжи да игра и на 57-годишна возраст.
Пред неколку месеци Миура дебитираше за португалскиот второлигаш Оливејренсе, а сега одлучи да ја продолжи кариерата во тој португалски клуб и покрај тоа што има 56 години.
Еден од најдобрите азиски фудбалери во историјата професионалната кариера ја започна во 1982 година, за Јапонија постигна 55 гола на 89 настапи, а од јануари до јули 1999 година беше член на загрепски Динамо.
Миура е најстариот активен професионален фудбалер во светот, но сѐ уште нема намера да се пензионира.
Тој веќе претходно најави дека сака да игра до 60 години, а со останувањето во Оливејренсе е чекор поблиску до исполнување на таа цел.
Во февруари годинава Миура пристигна во Оливејренсе како позајмен од Јокохама и забележа 3 настапи, а сега позајмицата е продолжена до крајот на следната сезона. Во меѓувреме, Јапонецот ќе го прослави својот 57. роденден (на 26 февруари).
Оливејренсе се натпреварува во Лига 2, втората по ранг лига на Португалија. Лани сезоната ја заврши на 10. место од 18 клубови.
Интересно, во Оливејренсе соиграч му е Бразилец кој има ист прекар како Миура - Казу. Станува збор за дефанзивецот Кристиан Кенџи Вагацума Ферејра, кој води потекло од јапонски имигранти во Бразил.