Капитенот на англиската репрезентација истакна дека навивачите не треба да паничат поради лошите резултати на националниот тим воочи Светското првенство во Катар.
„Гордиот Албион“ пред два дена изгуби од Италија со 1:0 во натпревар од 5. коло во Лига А од Лигата на нации. Англија е закована на последното место на табелата со само 2 освоени бода, а поразот од „Аѕурите“ значи и дека Англичаните наредната сезона се селат во понизок ранг, односно Лига Б, бидејќи немаат ниту теоретски шанси за да изборат опстанок.
„Не паничиме, знаеме дека мораме да напредуваме. Нормално дека ја разбирам фрустрацијата на навивачите. Бев навивач на Англија, и понатаму сум. Ако имаме добар турнир, не сум сигурен дека луѓето и натаму ќе бидат загрижени за резултатите од летоска. Знам дека мораме да се подобриме“, рече Хари Кејн.
Англија последниот натпревар од оваа сезона на Лигата на нации ќе го одигра денеска кога од 20:45 часот на „Вембли“ ќе ја пречека Германија.
„Навивачите се секогаш одлични и нѐ поддржуваат. Знам дека и сега ќе бидат тука. Сите се возбудени поради Мундијалот. Се надевам дека ќе им се оддолжиме со добри резултати“, додаде тој.
Англија во Лигата на нации влезе како финалист од последното ЕУРО, но комплетно разочара во група со Италија, Германија и аутсајдерот Унгарија, која всушност вечерва против Италија се бори за првото место во групата и пласман во фајнл-фор разигрувањето за пехарот.
На Мундијалот во Катар репрезентацијата на Англија е во групата Б заедно со Иран, САД и Велс. Навидум лесна група, но токму САД, а особено Велс, се страшно мотивирани кога играат против Англија. Иако одамна, Англичаните уште не го заборавиле шокантниот пораз од САД на Мундијалот 1950 во Бразил поради кој испаднаа уште во групната фаза.