Поранешниот дефанзивец на „Топчиите“ сам се понуди да биде нов предводник од клупата велејќи дека знае како Арсенал да почне да игра далеку подобро.
Сол Кембел беше дел од онаа златна и непобедлива генерација на Арсенал кога жареше и палеше на Островот. Она од кое денес не остана ниту бледа сенка во Северен Лондон.
Како и многумина, и нему му е жал да го гледа Арсенал денес, никаква игра, слаби играчи, претпоследен на табелата без постигнат гол и без освоен бод.
„Мачно е да се гледа Арсенал во моментов, навистина мачно. Проблемот е во залагањето и во квалитетот. Да, потрошивме многу пари, во моментов најмногу од цела Англија, но проблем ни се квалитетот, конзистентноста и искуството“, почнува 46-годишниот Кембел говорејќи за talkSPORT.
„Добро е да се има потенцијал, секогаш бараме потенцијал, но понекогаш е потребен оној инстант гарантиран успех. Ова е многу, многу млад тим, мора да го запомните тоа, има недостаток на искуство - и тоа е основно!“, дополнува.
Но, сепак, младоста не смее да биде изговор, особено не за клуб од рангот на Арсенал.
„Некои од играчите треба да тренират основни работи. Може да се загуби, но начинот на кој примаме голови е прелесен. Времето потребно за реакција на некои од дефанзивците е проблем, а не се ни поддржуваат еден со друг, не чувствуваат кога доаѓа опасност“.
„Првиот гол (против Челси, заб. на прев.) ни прелета преку шестнаесетникот - па врати се назад и брани, не само да чекаш! Едноставно е, а тоа се А, Б и В лекции за одбрана. Направи Челси да постигне добри голови, а не едноставни. Прелесно е“, тврди Кембел, кој своевремено важеше за еден од најдобрите дефанзивци на светот.
„Јас можам да им помогнам. Само нека ми ја дадат работата и ќе им помогнам. Ќе ви кажам како се излегува на крај со пресинг од двајца играчи на Брентфорд! Мислам, што ли правеа? На тој натпревар пресингот беше од двајца, многу лесно за излегување на крај! Ја ширите играта и играчот што притиска треба да истрча уште десетина метри, а тоа ви отвора повеќе простор на средината. Тоа е многу едноставно!“, вели Кембел.
Кембел мина пет сезони во Арсена од 2001 до 2006 кога двапати ја освои Премиер лигата, трипати ФА купот, еднаш Лига купот, а играше и финале во Лигата на шампионите каде загуби од, тогаш моќната, Барселона со Роналдињо и Ето. Копачките ги закачи во 2011 година, а пред тоа на кратко се врати во Арсенал да одигра една последна полусезона со што дојде до вкупно 211 натпревари и 12 гола. За Англија одигра 73 натпревари со 1 гол и играше на Мундијалите 1998, 2002 и 2006, како и на ЕУРО 1996, 2000 и 2004.
Во тренерската кариера досега има водено два клуба и тоа Маклсфилд Таун од Лиг 2 и Саутенд Јунајтед од Лиг 1, но од минатото лето е без ангажман. Во меѓувреме беше и политички ангажиран, а и поддржувач на Брегзит.
