Јувентус проживува кошмарна сезона. Италијанскиот и европски гигант имаше катастрофален почеток на сезоната, со најлоши резултати откако се врати во Серија А, откако беше исфрлен поради местење натпревари.
„Старата дама“ е само осма во првенството, а во Лигата на шампионите го отвори натпреварувањето со два последователни порази - од ПСЖ и Бенфика. Во Торино во моментов владее хаос, сите меѓусебно се обвинуваат за очајните резултати и уште полошата игра. Врвот на незадоволството дојде викендов кога загубија од Монца. Работата да биде уште полоша, ова е прва победа за Монца оваа сезона, а избраниците на Масимилијано Алегри не прикажаа никаква игра на тој меч.
Капитенот на тимот Леонардо Бонучи не одигра ниту една минута против Монца, а помошникот на Алегри, Марко Ландучи, во изјава за медиумите по натпреварот, рече дека е изоставен од технички причини.
Но, Gazzetta dello Sport пишува дека Алегри решил да го изостави поради друга причина - поради изјавата што ја даде по поразот од Бенфика во Лигата на шампионите.
„Загрижен сум за состојбата во која се наоѓаме, нема смисла да се негира. За жал, имаме тенденција да ја губиме играта за време на натпреварите. Не знам зошто се случува тоа, но факт е дека тоа најмногу ме загрижува, дури и повеќе од лошите резултати“, изјави Бонучи, јасно алудирајќи на проблемот со тренерската тактика.
Тоа не е крајот на проблемите на Бонучи бидејќи навивачите на Јувентус објавија соопштение дека тој никогаш не бил и нема да биде лидер на нивниот тим.
