Полициски хеликоптер М-17 пред еден час се урнал веднаш по полетувањето од платформата на аеродромот во Скопје. Лесно повреден е само еден член на екипажот.
Како што информираат од МВР за МИА, денеска околу 11:30 часот на стара платформа до Полициската станица на Г.П. „Меѓународен Аеродром Скопје“, откако наполнил гориво, хелихоптер на МВР M-17 од засега непознати причини паднал при полетување. Во него имало пет лица.
Според првичните информации едно лице се здобило со лесни телесни повреди.
Министерот на внатрешни работи Наќе Чулев ја потврди веста преку социјалните мрежи.
„Денес околу 11.30 часот пријавено е дека на стара платформа до Полициската станица на Г.П. „Меѓународен Аеродром Скопје“ од кога наполнил гориво хелихоптер на МВР M 17 се превртел. Во него биле пет лица, а кај едно лице се утврдени лесни телесни повреди. Согласно годишниот план за редовни активности, припадниците на МВР извршувале тренажен лет.
Министерството за внатрешни работи, согласно Законот за воздухопловство ќе ги преземе сите неопходни мерки, а во соработка со Агенција за цивилна и воздушна пловидба ќе се формира комисија која ќе треба во целост да ги утврди фактите и околностите под кои се случил настанот. Жалам за незгодата, но позитивна вест е фактот дека во истата нема жртви или повредени со потешки повреди“, напиша Чулев.