Норвешкиот голгетер и натаму е цел на разно-разни шпекулации за промена на средината која би чинела вртоглава сума поради тоа што за него велат дека е правиот наследник на Роналдо и Меси.
Моментално Ерлинг Браут Холанд е со репрезентацијата на Норвешка со која го очекуваат три мундијалски квалификациски натпревари и тоа против Гибралтар, Турција и Црна Гора.
На репрезентативна прес-конференција, новинарите наместо прашања поврзани за националниот дрес, му упатуваа и незгодни околу наводен трансфер во гигантите Манчестер Сити и Барселона.
„Јас сѐ уште имам три години од договорот. Не се секирам многу околу тоа“, дипломатски рече фудбалерот на Борусија од Дортмунд.
Него многумина го квалификуваат како наследник на Лео Меси и Кристијано Роналдо со оглед на бројот на голови кои ги постигнува.
„Медиумите се оние кои пишуваат за такви споредби, јас не се ни фокусирам на такви работи“, тврди тој, иако, несомнено му годат такви споредби со двајцата великани.
Холанд кариерата ја почна во тимот на Брине каде на 16 години во 4. лига играјќи за вториот тим на 11 натпревари постигна 16 голови. Се пресели во Молде каде на 50 натпревари даде 20 голови по што следуваше трансфер во австриски Салцбург. Таму блесна со 29 голови на 27 натпревари по што Борусија веднаш го прибра и за која до денес има 49 голови на исто толку натпревари.
„Сакам секојдневно да се подобрувам. Роналдо и Меси... Не ни треба да зборувам за нив, тие се најдобри на сите времиња. Тие сѐ уште ми се многу далечни“, скромно заврши норвешкото чудо.
За Норвешка досега има 6 голови на 7 натпревари, а како тргнал несомнено е дека ќе го урне рекордот на легендарниот Јерген Јуве кој со 33 голови е најдобар стрелец во историјата на Норвешка, рекорд кој никој не успеал да го собори уште од 1937 година кога и бил поставен. Тоа не им успеа ниту на Оле Гунар Солскјер, Торе Андре Фло и Јон Карев.
