Во Европскиот парламент беше изгласан Законот за батерии и истрошени батерии.
Новиот закон ја зајакнува позицијата на потрошувачите, а ги обврзува производителите да ги дизајнираат батериите и уредите на таков начин што ќе биде лесно да се отстрануваат и заменуваат. Со тоа, меѓу другото, се става точка на праксата на лепење на батеријата на уредот, што ги спречуваше корисниците да ја заменат, поради што мораа да купуваат целосно нов уред.
„Во анкетата што ја спроведов, 94% од граѓаните сметаат дека треба да биде полесно да се смени батеријата на уредите, додека 57% забележаа дека батеријата им се намалила (во капацитет) по ажурирање на системот. Со овој закон ги приморуваме производителите да се откажат од праксата ‘купи-користи-фрли’, покрај зголемувањето на издржливоста и подобрувањето на информираноста на потрошувачите. Повторно ќе биде лесно да се отстрани или замени батеријата, а на неа ќе има етикета и QR кодови со информации за нејзиниот капацитет, перформанси, издржливост и слично“, објасни хрватската европратеничка Билјана Борзан.
Со воведувањето на дигитален пасош за батериите ќе се заокружи процесот од производство до рециклирање на батериите, а електронскиот снимач во уредите ќе ги содржи сите информации за животниот век на батеријата.
„Пасошот за батеријата ќе биде достапен преку QR код, а на тој начин потрошувачите ќе можат да видат какви батерија е вградена, како била произведена, како може да се поправи, дали може да се замени...“, рече Борзан.
Исто така, големите компании ќе мораат да спроведуваат темелни анализи за да се соочат со социјалните и еколошките ризици од набавувањето, преработката и трговијата со суровини, а во батериите ќе треба да користат минимални нивоа на обновен кобалт, олово, литиум и никел.
Минималната цел за за собирање на преносливите батерии до 2030 година е 73%.
