MrBeast го надмина PewDiePie како креатор на содржини на YouTube со најмногу претплатници во светот, пишува Dexerto.
Џими Доналдсон, познат како MrBeast, официјално стана најследениот YouTube инфлуенсер со 111 милиони претплатници, а бројот секојдневно расте.
Dexerto на Twitter објави исечок во кој го прикажува моментот кога се случило тоа, при што MrBeast добил десетици илјади следбеници во еден ден. Откако во јули ја постигна целта од 100 милиони претплатници, MrBeast продолжи да го зголемува бројот на обожаватели.
Според Forbes, 24-годишникот во 2021 година заработил 54 милиони долари, а неговата нето вредност моментално изнесува 25 милиони долари.
Јутјуберот наводно заработува околу 5 милиони долари месечно, што го прави најплатениот креатор на содржини на YouTube. MrBeast има свој канал веќе 10 години, а неговата платформа почна да се проширува во 2017 година поради импресивните авантури и парични награди.
Во видео од 2018 година наречено „Како подарив 1.000.000 долари?“, MrBeast им објасни на обожавателите како акумулирал толкаво богатство преку платформата, додавајќи дека со помош на компаниите успеал да ги донира парите.
Кога почнал да му се зголемува бројот на претплатници на YouTube, како награда добивал договори со различни брендови. Неговиот прв договор бил вреден 5.000 долари, но наместо за себе да ги потроши парите, смислил начин како да привлече внимание.
Ги дал парите на непознат човек и тоа го снимил. Секако, видеата од овој тип секогаш привлекуваат внимание, па токму ваквите идеи станале клучни за неговиот успех.
