Вториот носител, Русинот Даниил Медведев, во полуфиналето на последниот Грен слем турнир во оваа година ќе игра против 15. носител Феликс Ожер-Алиасим од Канада, додека во женска конкуренција за влез во финалето на УС Опен ќе се борат канадската сензација Лејла Фернандес и втората носителка, Белорусинката Арина Сабаленка.
Ожер-Алиасим пласманот во полуфиналето го обезбеди откако Шпанецот Карлос Алкарас го предаде натпреварот при резултат 6-3, 3-1 поради повреда на ногата.
Медведев во четвртфиналето по два часа и 24 минути игра, со 6-3, 6-0, 4-6, 7-5, го совлада Холанѓанецот Ботик ван де Зандсхулп, 117-ти рангираниот тенисер во светот, кој место на главниот турнир избори преку квалификациите. Медведев играше во финалето на УС Опен во 2019 година, кога во пет сетови загуби од Рафаел Надал, а минатата година во полуфиналето беше поразен од Австриецот Доминик Тим, кој потоа ја освои титулата.
Фернандес, 73. рангирана на ВТА листата, до полуфиналето дојде со триумф над 5-тата носителка, Украинката Елина Свитолина, и за 19-годишната Канаѓанка ова ќе биде прво полуфинале на грен-слем турнир.
Сабаленка, која како и Фернандес за прв ќе игра полуфинале на УС Опен, во четвртфиналето во два сета ја совлада победничката на Ролан Гарос, Барбора Крејчикова од Чешка.
