Изминативе денови во два наврата беше претставено ново правило на Премиер лигата, кое ги збуни гледачите, но и самите играчи кои не знаат зошто добиваат жолти картони.
Голема полемика предизвика ситуацијата која се случи во саботата, кога што Марио Лемина доби црвен картон на дуелот меѓу Саутемптон и Вулверхемптон.
Лемина доби втор жолт картон бидејќи како трет фудбалер на својот тим му пријде на судијата во текот на протест за одлука. Првите двајца играчи кои ќе пристапат да протестираат нема да добијат жолт картон, а третиот ќе добие, според новите правила.
Неговиот соиграч Рубен Невеш по натпреварот објасни што му кажал судијата.
„Навистина сакаш да знаеш што ми кажа? Ми кажа дека двајца играчи трчале кон него, а бидејќи Марио Лемина беше третиот што му пријде, доби жолт картон и беше исклучен. Сега одиме да ги провериме правилата, ако тоа правило воопшто постои“, рече збунетиот Невеш.
Дека тоа не се случи случајно и дека е новитет во Премиер лигата, видовме и синоќа на дуелот помеѓу Манчестер Сити и Астон Вила. Повторно се случи идентична сцена.
Даглас Луис го турна Кевин Де Брујне. Незадоволните играчи на Сити веднаш почнаа да трчаат кон судијата Роб Џонс барајќи жолт картон. Први му пријдоа Илкај Ѓундоан и Џек Грилиш, а потоа трет пристигна Рубен Диаш. Веднаш доби жолт картон.
А Диаш беше изненаден и збунет од жолтиот картон и докажа дека ни играчите не разбираат зошто добиваат картони.
Дека никој не може да се справи со правилото покажа изјавата на легендата на Манчестер Јунајтед, Гари Невил, за време на програмата во живо на Sky Sports.
„Секако дека првиот човек што приоѓа во знак на протест треба да биде казнет. Ако сте вие тој што ги поттикнал протестите, а играчите ве следат и вие треба да бидете казнети, а не третиот играч“, изјави Невил.
Невил се прашува и што се случува со четвртиот или петтиот играч кој доаѓа да протестира. Тоа ќе го видиме наскоро во англискиот фудбал, очигледно.
