Центарот на македонската кошаркарска репрезентација, Бојан Крстевски, е оптимист пред вечерашниот дуел со Словачка во 2. коло од претквалификациите за ЕвроБаскетот 2025.
„Црвено-жолтите“ пред три дена ја победија Данска во првото коло на гостински терен во Нествед со кош во последната секунда.
– Заслужено победивме во Данска, беше еден тежок меч, на крај можеби заврши и среќно за нас со тој шут, но победивме сосема заслужено. Мора да го заборавиме тој натпревар, затоа што ако не го добиеме овој со Словачка, победата во Данска нема ништо да ни значи. На терен мора сите да бидеме фокусирани и мотивирани за да ја оствариме нашата цел. Словаците ни се добро познати затоа што со нив игравме двапати лани, можам да кажам дека горе-долу се во ист состав. Сите работи остануваат на нас, изјави Крстевски, пренесува КФСМ.
Натпреварот ќе се игра во СРЦ „Кале“ во Скопје со почеток во 19 часот.
