Младиот шведски репрезентативец упати апел до Златан Ибрахимовиќ да ја прекине репрезентативната пензија и да ѝ помогне на Шведска на претстојното Европско првенство.
Дејан Кулушевски од ноември 2019 година е сениорски репрезентативец на Шведска кога после неколку одбивања да ги брани боите на Македонија конечно заигра за земјата за која сакаше. Но, Дејан има една голема неостварена желба, а тоа е да игра заедно со легендата Златан Ибрахимовиќ, кој се повлече од репрезентацијата по ЕУРО 2016.
„Си пишуваме еден со друг. Тој е мој идол бидејќи ретко кој друг на светот би можел да го прави она што тој го прави. Кога ме фали, ме тера уште понапорно да работам наредниот ден на тренинг, бидејќи ме прави горд“, вели Кулушевски за Sky Sport Italia.
„Навистина се надевам дека ќе се врати во репрезентацијата на Шведска за ЕУРО. Тоа би било прекрасно и за мене и за цела Шведска. Ајде Ибра!“.
На Шведска во последно време не ѝ оди добро. Репрезентацијата без Ибра направи изненадување со пласманот на Мундијалот во Русија 2018 кога ја елиминираше Италија во баражот, а и на завршницата играше одлично, но потоа резултатски почна да паѓа. Се пласираше а ЕУРО 2020, но неуверливата и бледа игра не ветува добар помина на континенталното првенство.
Златан завчера се врати на зелениот терен по повредата која го примора да седи надвор уште од крајот на ноември. Сезонава има постигна дури 10 гола во Серија А.
А, пак, Кулушевски во принцип влегува од клупата кај Јувентус и сезонава запиша вкупно 15 настапи во Серија А збогатени со 3 гола и една асистенција.
