Холандскиот тренер Роналд Куман детално опиша како се однесувал Лионел Меси на тренинзите во Барселона во сезоната што му претходеше на заминувањето во Пари Сен Жермен.
„Ги фрлаше сите во сенка. Се чинеше дека секој е подобар само поради него. Тоа не е критика, тоа е опсервација. Знаев јас колку е добар, но секогаш е неверојатно да се види во живо. Знаеше сѐ што можете да научите еден фудбалер, беше совршен во сѐ. Препознавање ситуации, примање топка под притисок, трчање со топка, завршување акции пред голот... Тоа не е нормално, не е нормално“, рече Куман.
Холанѓанецот потоа дополнително ја откри разликата помеѓу Меси и другите играчи.
„На тренинг, некои играчи се шегуваа, шутираа од лесни позиции, се опуштаа... Меси не. Тој ја шутираше секоја топка со голема сила, сѐ беше функционално. Исто така, сакаше да победи во сѐ“, додаде тој.
Куман потсети и на една анегдота од тренинг на Барселона.
„Пред тренинг игравме ‘во круг’ и кој ќе загубеше три пати ќе мораше да направи спринтови за казна. Го прашав Меси дали некогаш морал да го стори тоа. ‘Да, еднаш“, рече. Кога играше тој , постарите фудбалери никогаш не губеа од помладите. Тоа се случи еднаш и Меси беше сериозно лут цела недела. Беше вистински тиранин на тренинзи“, заклучи Куман.
Меси играше за сениорскиот тим на Барселона од 2004 година пред да се пресели во ПСЖ, а на 778 официјални натпревари постигна неверојатни 672 гола.
