Во дерби натпреварот од 3. коло на италијанската Серија А фудбалерите на Лацио го победија Интер на „Олимпико“ со 3:1, нанесувајќи му го првиот овосезонски пораз.
„Бјанкочелестите“ поведоа во 40. минута преку Фелипе Андресон, но токму кога започна вториот дел Интер успеа да израмни со голот на Лаутаро Мартинес.
„Нераѕурите“ потоа тргнаа по пресврт, но наместо тоа доживеаја вистински шок, а за тоа се погрижија двајца Шпанци.
Во 75. минута Луис Алберто постигна ретко виден гол кога налета на повратната топка и од прва шутираше од околу 20 метри, погодувајќи го спротивниот агол со топовски удар, за водство на римскиот клуб од 2:1.
На четири минути до крајот Педро со уште еден многу убав гол ги постави конечните 3:1.
Лацио во следното коло гостува кај Сампдорија, додека Интер е домаќин на Кремонезе, натпревар кој ќе се игра во вторник поради што Интер кај Лацио гостуваше во петок.
Претходно синоќа Удинезе славеше со 2:1 со пресврт на гостувањето кај Монца, а нашиот Илија Несторовски влезе од клупата и асистираше за победничкиот гол.
Денеска во Серија А се играат 4 натпревари:
18:30
Кремонезе - Торино
Јувентус - Рома
20:45
Милан Болоња
Специја - Сасуоло
