Еден од најдобрите кошаркари на поранешна Југославија, Радивој Корач, официјално ќе биде примен во Куќата на славните во Спрингфилд на 10 септември, објави организацијата на својата официјала веб-страница.
Покрај Корач, кој загина во 1969 година на 30-годишна возраст, во Куќата на славните во септемвриската класа ќе бидат примени Тим Хардавеј, Ману Џинобили, Боб Хигинс, Џорџ Карл, Хју Еванс, Дел Харис, Лу Хадсон и Лери Костело.
Во женска конкуренција нови членки на Куќата во Спрингфилд ќе станат Линдзи Вејлен, Свин Кеш, Мариан Стенли и Териса Шанк-Гренц.
Корач ќе биде петтиот српски кошаркар во Куќата на славните по Борислав Станковиќ (1991), Александар Николиќ (1998), Дражен Далипагиќ (2004) и Владе Дивац (2019).